Палеская ластаўка: да 70-годдзя з дня нараджэння Яўгеніі Янішчыц
“Палеская ластаўка” – пад такой назвай у школе прайшло мерапрыемства, прысвечанае 70-годдзю з дня нараджэння Я.Янішчыц.
У ходе літаратурнай кампазіцыі, падрыхтаванай вучнямі 10-х класаў, прысутныя змаглі пазнаёміцца са старонкамі жыццёвага і творчага шляху паэткі, дакрануцца да чароўнага свету яе паэзіі. У выкананні вучняў гучалі вершы Я.Янішчыц пра малую радзіму, мову, бацькоў, каханне, жыццё і смерць. Шчымлівым болем былі напоўнены радкі іншых паэтаў пра заўчасную смерць Я.Янішчыц:
Жэня, Жэня!
Што ж ты нарабіла?
Як жа мы цябе не збераглі?!
Жорсткім ветрам паламала крылы
Ластаўцы зняверанай зямлі…
Сумная запозненая пошта
Больш не прынясе твае лісты…
Ластаўка палеская, навошта
Гэтак рана адляцела ты?...
Семдзесят бы было ў залатым лістападзе,
Ды цябе трыццаць год побач з намі няма.
Нам ніколі віны прад табой не загладзіць.
Хочам верыць вясне, а на сэрцы – зіма.
Юбілейную дату краіна святкуе.
Паэтычна гучыць беларускі матыў.
Ясяльдзянкай жывеш, памяць вершы друкуе.
Іх стагоддзі чытаць. Голас твой не астыў!
Мерапрыемства суправаджалася мультымедыйнай прэзентацыяй, быў прагледжаны і невялікі відэаролік пра Я.Янішчыц, зняты на малой радзіме паэткі – на Піншчыне.
